கரூர் கூட்ட நெரிசல்: அரசு வேலை விவகாரத்தில் உச்ச நீதிமன்றம் அதிரடி!

கரூரில் கடந்த ஆண்டு செப்டம்பர் 27-ம் தேதி நடைபெற்ற தமிழக வெற்றிக் கழகப் பிரசாரக் கூட்டத்தில் ஏற்பட்ட கூட்ட நெரிசலில் சிக்கி 41 பேர் உயிரிழந்தனர். இந்த துயரச் சம்பவத்தில் உயிரிழந்தவர்களின் குடும்பங்களுக்கு தமிழக அரசு பல்வேறு நிவாரண உதவிகளை வழங்கியதுடன், ஒவ்வொரு குடும்பத்திலும் ஒருவருக்கு அவர்களின் கல்வித் தகுதிக்கு ஏற்ப கருணை அடிப்படையில் அரசு வேலை வழங்கும் முடிவையும் எடுத்தது.

இந்த பணி நியமனத்தை எதிர்த்து நாம் தமிழர் கட்சியைச் சேர்ந்த தீரன் திருமுருகன் மற்றும் வழக்கறிஞர் சீனி அகமது ஆகியோர் உயர் நீதிமன்ற மதுரைக் கிளையில் பொதுநல மனு தாக்கல் செய்தனர். இந்த வழக்கை விசாரித்த நீதிபதிகள் கார்த்திகேயன், சக்திவேல் ஆகியோர் அடங்கிய அமர்வு, கருணை அடிப்படையிலான அரசு பணி நியமனம் தொடர்பாக உச்ச நீதிமன்றம் ஏற்கெனவே வழங்கியுள்ள வழிகாட்டுதல்கள் பின்பற்றப்படவில்லை எனக் கூறி, தமிழக அரசு பிறப்பித்த அரசாணையை ரத்து செய்தது.

உச்ச நீதிமன்றத்தை நாடிய தமிழக அரசு

உயர் நீதிமன்ற உத்தரவை எதிர்த்து தமிழக அரசு உச்ச நீதிமன்றத்தில் மேல்முறையீடு செய்தது. அரசியலமைப்புச் சட்டத்தின் 162-வது பிரிவின் கீழ், பாதிக்கப்பட்ட குடும்பங்களின் வாழ்வாதாரத்தை கருத்தில் கொண்டே அரசு வேலை வழங்கும் முடிவு எடுக்கப்பட்டதாக தமிழக அரசு தரப்பில் தெரிவிக்கப்பட்டது. இந்த வழக்கில் தமிழக அரசு சார்பில் மூத்த வழக்கறிஞர்கள் அபிஷேக் மனு சிங்வி, முகுல் ரோஹத்கி ஆகியோர் ஆஜராகினர். அரசு வேலை பெற்றிருந்த பாதிக்கப்பட்ட குடும்பங்களைச் சேர்ந்தவர்களும் தனித்தனியாக உச்ச நீதிமன்றத்தில் மனுக்கள் தாக்கல் செய்திருந்தனர்.

“அரசியலை இங்கு கொண்டு வராதீர்கள்”

வழக்கு விசாரணையின்போது, மனுதாரர்கள் தரப்பில் ஏற்கெனவே அரசு மற்றும் கட்சி சார்பில் நிதியுதவி வழங்கப்பட்டுள்ள நிலையில், மீண்டும் அரசு வேலை வழங்கியிருப்பது குறித்து கேள்வி எழுப்பப்பட்டது. அப்போது நீதிபதிகள், “முதலில் நீங்கள் யார்? எதற்காக இந்த மனுவை தாக்கல் செய்தீர்கள்?” எனக் கேள்வி எழுப்பினர். தான் அரசியல் கட்சியைச் சேர்ந்தவர் என வழக்கறிஞர் தெரிவித்தபோது, “அரசியலை இங்கு கொண்டு வராதீர்கள்” என நீதிபதிகள் தெரிவித்தனர். கரூர் கூட்ட நெரிசல் சம்பவம் மிகவும் துயரமானது என்றும், அத்தகைய சம்பவம் நடந்திருக்கக் கூடாது என்றும் நீதிபதிகள் குறிப்பிட்டனர்.

“அரசு வேலை வழங்கக் கூடாதா?”

விசாரணையின்போது நீதிபதி ஜே.பி. பர்திவாலா எழுப்பிய கேள்விகள் இந்த வழக்கில் முக்கியத்துவம் பெற்றன. “கூட்ட நெரிசலில் சிக்கி பலர் உயிரிழந்துள்ளனர். அவர்களின் குடும்பங்களுக்கு அரசு உதவி செய்ய முடிவு செய்தால் அதில் என்ன பிரச்சினை?” என அவர் கேள்வி எழுப்பினார். மேலும், “ஒரு குடும்பத்தின் ஒரே வருமானம் ஈட்டும் நபர் உயிரிழந்துவிட்டால், அந்த குடும்பத்தில் வேறு யாரும் சம்பாதிக்காமல் இருக்கும் சூழல் ஏற்படலாம்.

அப்படிப்பட்ட நிலையில், உயிரிழந்தவரின் மனைவி, மகன் அல்லது மகளின் கல்வித் தகுதிக்கு ஏற்ப அரசு வேலை வழங்கக் கூடாதா?” என்றும் நீதிபதி கேள்வி எழுப்பினார். கருணை அடிப்படையில் வழங்கப்படும் உதவி, ஒரு குடும்பத்தின் வாழ்வாதாரத்தை மீட்டெடுப்பதற்கான நடவடிக்கையாக இருக்க முடியாதா என்ற கோணத்திலும் நீதிமன்றத்தின் கேள்விகள் அமைந்தன.

உயர் நீதிமன்ற உத்தரவுக்கு இடைக்காலத் தடை

இதையடுத்து, நீதிபதிகள் ஜே.பி. பர்திவாலா மற்றும் கே.வினோத் சந்திரன் அடங்கிய உச்ச நீதிமன்ற அமர்வு, எதிர்மனுதாரர்களுக்கு நோட்டீஸ் பிறப்பித்து வழக்கை ஒத்திவைத்தது. அதே நேரத்தில், கரூர் கூட்ட நெரிசலில் உயிரிழந்தவர்களின் குடும்பங்களுக்கு அரசு வேலை வழங்கிய தமிழக அரசின் அரசாணையை ரத்து செய்த உயர் நீதிமன்ற மதுரைக் கிளையின் உத்தரவுக்கும் இடைக்காலத் தடை விதிக்கப்பட்டது. இதனால், உயிரிழந்தவர்களின் குடும்பங்களுக்கு வழங்கப்பட்ட அரசு வேலைகளின் நிலை தற்போது தொடரும் சூழல் ஏற்பட்டுள்ளது. எனினும், இந்த வழக்கில் உச்ச நீதிமன்றத்தின் இறுதி தீர்ப்பு இன்னும் வெளியாகவில்லை என்பது குறிப்பிடத்தக்கது.