இங்கிலாந்து அணிக்கு எதிராக வைபவ் சூரியவன்ஷியை களமிறக்க கூடாது - ஸ்ரீகநாத் விமர்சனம்

வைபவ் சூர்யவன்ஷி குறித்து ஸ்ரீக்காந்த் கருத்து

அயர்லாந்துக்கு எதிரான டி20 தொடரில் இந்திய அணியின் இளம் நட்சத்திரம் வைபவ் சூர்யவன்ஷிக்கு வாய்ப்பு வழங்கப்படாதது தவறான முடிவு என்று முன்னாள் இந்திய கேப்டன் கிருஷ்ணமாச்சாரி ஸ்ரீக்காந்த் தெரிவித்துள்ளார். இருப்பினும், தற்போது இங்கிலாந்துக்கு எதிரான டி20 தொடரின் முதல் இரண்டு போட்டிகளில் அவரை விளையாட வைக்கக் கூடாது என்றும் அவர் கருத்து தெரிவித்துள்ளார். இந்த முரண்பட்ட கருத்து தற்போது கிரிக்கெட் ரசிகர்களிடையே விவாதத்தை ஏற்படுத்தியுள்ளது.

'அபிஷேக் சர்மாவுக்கு ஓய்வு கொடுத்திருக்கலாம்'

தனது யூடியூப் சேனலில் பேசிய ஸ்ரீக்காந்த், "அயர்லாந்துக்கு எதிரான இரண்டாவது டி20 போட்டியில் வைபவ் சூர்யவன்ஷி 100 சதவீதம் விளையாடியிருக்க வேண்டும். முதல் போட்டியில் அபிஷேக் சர்மா அரைசதம் அடித்து சிறப்பாக விளையாடியிருந்தார். அவர் ஏற்கனவே அணியில் தனது இடத்தை உறுதி செய்துவிட்டார். எனவே அவருக்கு ஓய்வு அளித்து, அந்த இடத்தில் வைபவ் சூர்யவன்ஷிக்கு வாய்ப்பு கொடுத்திருக்கலாம்" என்று கூறினார்.

'வைபவ் போட்டியை வென்று கொடுத்திருக்கக் கூடும்'

மேலும் பேசிய ஸ்ரீக்காந்த், "யாருக்குத் தெரியும்? ஐபிஎல்லில் கடினமான சூழ்நிலைகளிலும் வைபவ் சூர்யவன்ஷி சிறப்பாக விளையாடியிருக்கிறார். அதேபோல் அயர்லாந்துக்கு எதிராகவும் அவர் தாக்கத்தை ஏற்படுத்தி, இந்திய அணிக்கு வெற்றியை பெற்றுக் கொடுத்திருக்கக்கூடும். அந்த வாய்ப்பை அவருக்கு வழங்காமல் விட்டது ஏமாற்றமாக உள்ளது" என்றார்.

ஆனால் இங்கிலாந்துக்கு எதிராக மாற்றம் வேண்டாம்

அதேநேரத்தில், தற்போது இங்கிலாந்துக்கு எதிரான தொடரில் இந்திய அணி தொடக்க ஜோடியை மாற்ற வேண்டிய அவசியம் இல்லை என்றும் ஸ்ரீக்காந்த் தெரிவித்துள்ளார். "அயர்லாந்து தொடரில் வைபவ் விளையாடாத நிலையில், இப்போது இங்கிலாந்துக்கு எதிரான முதல் இரண்டு டி20 போட்டிகளில் அவரை நேரடியாக களமிறக்க மாட்டேன். ஏற்கனவே இருக்கும் தொடக்க வீரர்களுக்கு தொடர்ந்து வாய்ப்பு கொடுக்க வேண்டும். தொடரின் நடுவில் தேவையெனில் மாற்றத்தை யோசிக்கலாம்" என்று அவர் விளக்கினார்.

சூர்யவன்ஷியை சுற்றி தொடரும் விவாதம்

அயர்லாந்து தொடருக்குப் பிறகு வைபவ் சூர்யவன்ஷியை அணியில் சேர்க்காதது குறித்து பல முன்னாள் வீரர்கள் மாறுபட்ட கருத்துகளை தெரிவித்து வருகின்றனர். ஒருபுறம் அவருக்கு வாய்ப்பு வழங்கியிருக்க வேண்டும் என்ற குரல்கள் எழுந்தாலும், மறுபுறம் இளம் வயதில் அவசரப்படுத்த வேண்டாம் என்ற கருத்துகளும் வலுப்பெற்று வருகின்றன. இந்நிலையில், இங்கிலாந்து தொடரின் அடுத்தடுத்த போட்டிகளில் இந்திய அணி நிர்வாகம் வைபவ் சூர்யவன்ஷிக்கு வாய்ப்பு வழங்குமா என்பது ரசிகர்களின் எதிர்பார்ப்பாக மாறியுள்ளது.