ஹர்திக் பாண்டியாவை குறிவைக்கும் சிஎஸ்கே? சிவம் துபேவை டிரேட் செய்யலாம்... எஸ். பத்ரிநாத் சொன்ன ட்ரீம் XI வைரல்!

ஹர்திக் பாண்டியா குறித்து பத்ரிநாத் வெளியிட்ட அதிரடி கருத்து

ஐபிஎல் 2027-ஐ முன்னிட்டு வீரர்கள் இடமாற்றம் மற்றும் மெகா ஏலம் குறித்த தகவல்கள் தினமும் பரபரப்பை ஏற்படுத்தி வரும் நிலையில், முன்னாள் சென்னை சூப்பர் கிங்ஸ் வீரர் எஸ். பத்ரிநாத் ஹர்திக் பாண்டியாவை மையமாகக் கொண்டு முக்கிய கருத்துகளை பகிர்ந்துள்ளார். குறிப்பாக, ஹர்திக்கை சிஎஸ்கே எப்படி அணியில் சேர்க்கலாம் என்பது குறித்து அவர் கூறிய யோசனைகள் ரசிகர்களிடையே அதிக கவனம் பெற்றுள்ளன.

'ஹர்திக்கை சும்மா விட மும்பை தயாராக இருக்காது'

மும்பை இந்தியன்ஸ் அணி ஹர்திக் பாண்டியாவை எந்தவிதமான பலனும் இல்லாமல் விடாது என்று பத்ரிநாத் தெரிவித்துள்ளார். "ஹர்திக்கை டிரேட் செய்ய வேண்டுமென்றால், மும்பை இந்தியன்ஸ் அதற்கு ஈடாக குறைந்தது இரண்டு வீரர்களையாவது எதிர்பார்க்கும். சிஎஸ்கே, சிவம் துபேவை ஹர்திக் பாண்டியாவுக்கு மாற்றாக டிரேட் செய்யலாம். ஆல்-ரவுண்டர் இடத்திற்கு ஆல்-ரவுண்டர் என்ற அடிப்படையில் இது இரு அணிகளுக்கும் பொருத்தமான ஒப்பந்தமாக இருக்கலாம்" என்று அவர் கூறியுள்ளார்.

ஹர்திக்கும்... பென் ஸ்டோக்ஸும்... சிஎஸ்கேவுக்கு ட்ரீம் காம்போ?

ஹர்திக் பாண்டியாவுடன் சேர்த்து பென் ஸ்டோக்ஸையும் சிஎஸ்கே அணியில் இணைக்க முடிந்தால், அது அந்த அணிக்கே கனவு போன்ற சூழலாக இருக்கும் என்று பத்ரிநாத் தெரிவித்துள்ளார். "ஹர்திக்கும், பென் ஸ்டோக்ஸும் ஒரே அணியில் இருந்தால் சிஎஸ்கேவின் சமநிலை வேறு லெவலுக்கு செல்லும். சிஎஸ்கே நிச்சயமாக ஹர்திக் குறித்து பேச்சுவார்த்தையில் இருக்கும். ஆனால் அதை இப்போது வெளிப்படையாக சொல்ல விரும்பாமல் இருக்கலாம்" என்றும் அவர் கூறியுள்ளார்.

கேகேஆருக்குத்தான் ஹர்திக் சரியான தேர்வா?

சன்ரைசர்ஸ் ஹைதராபாத் மற்றும் ராயல் சேலஞ்சர்ஸ் பெங்களூரு அணிகளைத் தவிர, மற்ற அனைத்து அணிகளும் ஹர்திக் பாண்டியாவை விரும்புவதாக தகவல்கள் வெளியாகி வருவதாக பத்ரிநாத் குறிப்பிட்டார். "புகை இல்லாமல் நெருப்பு வராது. இவ்வளவு செய்திகள் வெளியாகின்றன என்றால், மும்பை இந்தியன்ஸ் ஹர்திக்கை டிரேட் செய்ய தயாராக இருக்கலாம். இருப்பினும், ஹர்திக்கிற்கு மிகவும் பொருத்தமான அணி கொல்கத்தா நைட் ரைடர்ஸ்தான். அந்த அணிக்கு ஒரு தரமான ஆல்-ரவுண்டர், கேப்டன் மற்றும் அனுபவம் வாய்ந்த மூத்த வீரர் தேவை. இந்த மூன்றுக்கும் ஹர்திக் சரியான தேர்வாக இருப்பார்" என்று அவர் விளக்கினார்.

பத்ரிநாத்தின் ட்ரீம் சிஎஸ்கே XI

ஐபிஎல் 2027-க்கான தனது ட்ரீம் சிஎஸ்கே அணியையும் பத்ரிநாத் வெளியிட்டுள்ளார். அதில் சஞ்சு சாம்சன், ருதுராஜ் கெய்க்வாட், உர்வில் படேல், கார்த்திக் சர்மா, டெவால்ட் பிரேவிஸ், பென் ஸ்டோக்ஸ், ஹர்திக் பாண்டியா, ஜேமி ஓவர்டன், அன்ஷுல் கம்போஜ், நூர் அகமது, கலீல் அகமது ஆகியோர் இடம்பெற்றுள்ளனர். தாக்கம் ஏற்படுத்தும் (Impact Player) வீரராக எம்.எஸ். தோனியை அவர் தேர்வு செய்துள்ளார். இந்த அணி தற்போது சமூக வலைதளங்களில் ரசிகர்களிடையே தீவிரமாக விவாதிக்கப்பட்டு வருகிறது. ஹர்திக் உண்மையில் சிஎஸ்கேவுக்கு வருவாரா, அல்லது கேகேஆர் உள்ளிட்ட வேறு அணிக்கு செல்வாரா என்பது ஐபிஎல் 2027-ன் மிகப்பெரிய கேள்விகளில் ஒன்றாக மாறியுள்ளது.