இங்கிலாந்துக்கு எதிரான டி20 தொடரில் இந்திய அணிக்காக அறிமுகமான 15 வயது வைபவ் சூர்யவன்ஷி, தனது துணிச்சலான பேட்டிங்கால் ரசிகர்களின் கவனத்தை ஈர்த்தார். முதல் சர்வதேச போட்டியிலேயே அச்சமின்றி விளையாடிய அவர், ஜோஃப்ரா ஆர்ச்சர், ஜோஷ் டங் போன்ற வேகப்பந்துவீச்சாளர்களை எதிர்கொண்ட விதம் பல முன்னாள் வீரர்களின் பாராட்டைப் பெற்றது.
இந்த நிலையில், முன்னாள் இந்திய வீரர் முகமது கைஃப், வைபவின் அறிமுக ஆட்டத்தை பாராட்டியதோடு, அவரது ஆட்டத்தில் இன்னும் மேம்படுத்த வேண்டிய முக்கிய அம்சத்தையும் சுட்டிக்காட்டியுள்ளார்.
'ஆஃப் ஸ்பின்னர்களுக்கு எதிராக இன்னும் உழைக்க வேண்டும்'
தனது யூடியூப் சேனலில் பேசிய கைஃப், வைபவ் ஆஃப் ஸ்பின்னர்களுக்கு எதிராக அதிக அனுபவம் இல்லாததால்தான் முதல் போட்டியில் விக்கெட்டை இழந்தார் என்று கூறினார். "அவரது தொடக்கம் நன்றாகவே இருந்தது. ஆனால் ஆஃப் ஸ்பின்னரிடம் அவுட்டானார். ஐபிஎல்லில் தொடக்க வீரராக விளையாடியபோது எத்தனை முறை ஆஃப் ஸ்பின்னர்களை எதிர்கொண்டார்? அதுதான் பிரச்சனை. இது அவரது முதல் சர்வதேச போட்டி. அதனால் ஒரே போட்டியை வைத்து நான் அவரை மதிப்பிட மாட்டேன். ஆனால் ஆஃப் ஸ்பின்னர்களுக்கு எதிராக அவர் கண்டிப்பாக உழைக்க வேண்டும்," என்று கைஃப் தெரிவித்தார்.
'அபிஷேக் சர்மா செய்தது போல முன்னேற வேண்டும்'
அதே நேரத்தில், அபிஷேக் சர்மாவின் முன்னேற்றத்தை எடுத்துக்காட்டாகக் கூறிய கைஃப், தோல்விக்குப் பிறகுதான் திருத்தம் செய்ய வேண்டும் என்று காத்திருக்கக் கூடாது என்றார். "அபிஷேக் சர்மா இன்று ஆஃப் ஸ்பின்னர்களுக்கு எதிராக மிகவும் சிறப்பாக விளையாடுகிறார். உலகக் கோப்பையில் சிரமப்பட்ட பிறகு அதற்காக தனியாக பயிற்சி செய்து தனது ஆட்டத்தை மாற்றிக்கொண்டார். ஆனால் ஏன் ஒரு தோல்விக்காக காத்திருக்க வேண்டும்? புத்திசாலித்தனமான வீரர்கள் ஆரம்பத்திலேயே தங்களது பலவீனங்களை சரி செய்து கொள்வார்கள்," என்று அவர் விளக்கினார்.
'வைபவின் பீல்டிங்க்தான் என்னை அதிகம் கவர்ந்தது'
வைபவின் பேட்டிங்கை விட அவரது பீல்டிங் செயல்பாடுதான் தனக்கு மிகவும் மகிழ்ச்சி அளித்ததாக கைஃப் கூறினார். "வைபவ் சிக்ஸர்கள் அடிப்பார் என்பது அனைவருக்கும் தெரியும். அதை ஐபிஎல்லிலேயே பார்த்துவிட்டோம். ஆனால் இந்தப் போட்டியில் அவர் 20 ஓவர்களும் பீல்டிங் செய்தது, அதிலும் அழுத்தமான நேரத்தில் ஒரு கடினமான கேட்சைப் பிடித்தது என்னை மிகவும் கவர்ந்தது. அவர் ஒரு சிறந்த பீல்டராக உருவாகும் திறமை கொண்டவர் என்பதை அது நிரூபித்தது. ரன்கள் அவர் கண்டிப்பாக அடிப்பார். அதைப் பற்றி கவலைப்பட வேண்டியதில்லை. மொத்தத்தில் இது ஒரு சிறப்பான அறிமுகப் போட்டி," என்றார்.
'இம்பாக்ட் பிளேயராக மட்டும் பார்க்காதீர்கள்'
ஐபிஎல் அணிகளுக்கும் கைஃப் முக்கியமான ஆலோசனையை வழங்கினார். "வைபவை ஒரு இம்பாக்ட் பிளேயர் என்று மட்டும் முடிவு செய்து விடாதீர்கள். அவரை முழு 20 ஓவர்களும் பீல்டிங் செய்ய வையுங்கள். இளம் வீரரை பேட்டிங்கில் மட்டுமல்ல, பீல்டிங், உடற்தகுதி, அனைத்து துறைகளிலும் வளர்ப்பது ஐபிஎல் பயிற்சியாளர்களின் பொறுப்பு. அவரை முழுமையான கிரிக்கெட் வீரராக உருவாக்க வேண்டும்," என்று வலியுறுத்தினார்.
இந்தியாவின் அடுத்த நட்சத்திரமாக உருவாகும் வைபவ்?
15 வயதிலேயே சர்வதேச கிரிக்கெட்டில் காலடி எடுத்து வைத்துள்ள வைபவ் சூர்யவன்ஷி மீது இந்திய கிரிக்கெட்டின் எதிர்கால நம்பிக்கை அதிகரித்து வருகிறது. ரவி சாஸ்திரி, ஏபி டி வில்லியர்ஸ், ரவிச்சந்திரன் அஸ்வின், மோர்னே மோர்கல் உள்ளிட்ட பல முன்னாள் வீரர்கள் ஏற்கனவே அவரது திறமையை பாராட்டியுள்ளனர்.
இப்போது முகமது கைஃபும், வைபவ் ரன்கள் அடிப்பது உறுதி என்றும், ஆனால் உலகத் தரம் வாய்ந்த வீரராக மாற வேண்டுமெனில் ஆஃப் ஸ்பின்னர்களுக்கு எதிரான ஆட்டத்தையும், பீல்டிங்கையும் தொடர்ந்து மேம்படுத்த வேண்டும் என்று அறிவுறுத்தியுள்ளார்.
