பிக் பாஸ் சீசன் 8ல் விஜய் டிவி பிரபலம் கலந்து கொள்ள இருக்கும் தகவல் தான் தற்போது இணையத்தில் வைரலாகி வருகிறது. இந்திய அளவில் ஒளிபரப்பாகும் வரலாற்று பிரபலமான நிகழ்ச்சியில் பிக் பாஸ் ஒன்று. இந்த நிகழ்ச்சியை முதன் முதலில் ஹிந்தியில் தான் ஒளிபரப்பி இருந்தார்கள். அதற்குப் பிறகுதான் தமிழ், மலையாளம், தெலுங்கு, கன்னடம் என பல மொழிகளில் பிக் பாஸ் நிகழ்ச்சியை ஒளிபரப்பி வருகிறார்கள். அந்த வகையில் தமிழில் பிரம்மாண்டமாக விஜய் டிவியில் பிக் பாஸ் நிகழ்ச்சி ஒளிபரப்பப்பட்டு வருகிறது.
இந்த நிகழ்ச்சிக்கு என்று ஒரு தனி ரசிகர் பட்டாளமே இருக்கிறது. இதுவரை ஏழு சீசன்கள் முடிவடைந்து இருக்கிறது. இந்த ஏழு சீசன்களையும் நடிகர் கமல்ஹாசன் தான் தொகுத்து வழங்கியிருந்தார். இந்த நிகழ்ச்சி பல பேரின் கேரியருக்கு துணையாக நின்று இருக்கிறது. அதோடு பலரின் வாழ்க்கையையும் மாற்றி இருக்கிறது. இந்த நிகழ்ச்சி எந்த அளவுக்கு பிரபலமோ அந்த அளவுக்கு பிக் பாஸ் வீடும் பிரபலம்தான். இந்த பிக் பாஸ் வீட்டை பார்ப்பதற்காகவே நிகழ்ச்சியை பார்க்கும் ஒரு கூட்டம் இருக்கிறது.
கமல் விலகல்:
மேலும், கடந்த ஏழு சீசன்களாக தொகுத்து வழங்கிய நடிகர் கமல்ஹாசன் பிக் பாஸ் நிகழ்ச்சியில் இருந்து தற்காலிகமாக விலகுவதாக சமீபத்தில் தனது இன்ஸ்டாகிராம் பக்கத்தில் அறிவித்து இருந்தார். அதனைத் தொடர்ந்து சிம்பு அல்லது ரம்யா கிருஷ்ணன் இந்த நிகழ்ச்சியை தொகுத்து வழங்க உள்ளார்கள் என்று கூறப்பட்ட நிலையில், தற்போது இறுதியாக நடிகர் விஜய் சேதுபதி தான் பிக் பாஸ் சீசன் 8 நிகழ்ச்சியின் தொகுப்பாளராக கமிட் ஆகி உள்ளார் என்று கூறப்படுகிறது. ஆனால், இது குறித்து அதிகாரப்பூர்வ அறிவிப்பு எதுவும் சேனல் தரப்பில் இருந்து வெளியிடவில்லை.
பிக் பாஸ் சீசன் 8:
இது ஒரு பக்கம் இருக்க, மறுபக்கம் போட்டியாளர்களை தேர்ந்தெடுக்கும் வேலைகளும் செய்து வருகிறார்கள். இந்த நிகழ்ச்சிக்காக சினிமா பிரபலங்கள், சின்னத்திரை நட்சத்திரங்கள், யூட்யூபர்கள் என எல்லா தரப்பில் இருந்தும் சில பேரை தேர்ந்தெடுத்து அவர்களிடம் விஜய் டிவி பேச்சுவார்த்தை நடத்தி வருகிறதாம். வருகிற அக்டோபர் மாதம் முதல் வாரத்தில் இருந்து பிக் பாஸ் சீசன் 8 நிகழ்ச்சி தொடங்கும் என எதிர்பார்க்கப்படுகிறது. அந்த வகையில் ரியாஸ் கான், அமலா ஷாஜி, ரோபோ சங்கர், பாடகி கல்பனா, பப்லு ப்ரித்திவிராஜ், நடிகர் அஸ்வின் என்று பல பெயர்கள் சோசியல் மீடியாவில் அடிபட்டு வந்தது.
போட்டியாளர்கள் விவரம்:
அந்த வகையில் பிக் பாஸ் சீசன் 8 நிகழ்ச்சியில் முதல் போட்டியாளராக ‘பாரதி கண்ணம்மா’ சீரியல் நடிகர் அருண் தேர்வாகியுள்ளதாக கூறப்பட்டது. அதை தொடர்ந்து பாரதி கண்ணம்மா சீரியலில் வில்லியாக நடித்திருந்த பரீனாவும், ஜோயா ஆகியோர் கலந்து கொள்ள இருப்பதாக கூறப்படுகிறது. இந்நிலையில் பிக் பாஸ் 8 விஜய் டிவி பிரபலம் கலந்துகொள்ள இருக்கும் தகவல் தான் தற்போது வெளியாகி இருக்கிறது. அதாவது, சீரியல் நடிகர் தீபக் தான் நிகழ்ச்சியில் கலந்துகொள்ள இருக்கிறார்.
தீபக் குறித்த தகவல்:
இவர் சின்னத்திரை சீரியலின் மூலம் ரசிகர்கள் மத்தியில் தனக்கென ஒரு இடத்தை பிடித்திருப்பவர். இவர் நடிகர் மட்டும் இல்லாமல் தொகுப்பாளரும் ஆவார். இவர் சன், விஜய்,ராஜ் என பல சேனல்களில் ஒளிபரப்பாகி இருந்த தொடர்களில் நடித்து இருக்கிறார். அதோடு இவர் நிறைய ரியாலிட்டி நிகழ்ச்சிகளிலும் பங்கேற்று இருக்கிறார். கடைசியாக இவர் விஜய் டிவியில் ஒளிபரப்பாகி இருந்த ‘தமிழும் சரஸ்வதியும்’ என்ற சீரியல் ஹீரோவாக நடித்திருந்தார். இதற்கு பின் இவர் எந்த சீரியலிலும் நடிக்கவில்லை. தற்போது இவர் பிக் பாஸ் சீசன் 8 நிகழ்ச்சியில் கலந்து கொள்ள இருப்பதாக கூறப்படுகிறது. உண்மையிலேயே இவர் பிக்பாஸ் நிகழ்ச்சியில் கலந்து கொள்வாரா? இல்லையா? என்பதை பொறுத்திருந்து பார்க்கலாம்.
