வைபவை நீக்கிய முடிவுக்கு ஸ்ரீகாந்த் கடும் விமர்சனம்
ஜிம்பாப்வேக்கு எதிரான முதல் டி20 போட்டியில் அதிரடியான அரைசதம் விளாசிய வைபவ் சூர்யவன்ஷியை முன்னாள் இந்திய வீரர் கிரிஷ் ஸ்ரீகாந்த் வெகுவாகப் பாராட்டியுள்ளார். அதே நேரத்தில், இங்கிலாந்து தொடரில் மூன்று போட்டிகளில் ரன்கள் எடுக்காததற்காக அவரை அணியில் இருந்து நீக்கியது இந்திய அணி நிர்வாகத்தின் மிகப்பெரிய தவறு என்றும் அவர் கடுமையாக விமர்சித்துள்ளார்.
"அவருடைய ஷாட்கள் எல்லாமே கிளாஸ்"
தனது யூடியூப் சேனலில் பேசிய ஸ்ரீகாந்த், "வைபவ் சூர்யவன்ஷிக்கு எவ்வளவு ஷாட்கள் இருக்கிறது என்பதை இந்த இன்னிங்ஸ் மீண்டும் நிரூபித்தது. அதிலும் ஒரு ஷாட் கூட அவசரமாக அல்லது குறுக்கு மட்டையை (Cross-batted shot) பயன்படுத்தி ஆடியதாக இல்லை. ஒவ்வொரு ஷாட்டும் தரமான கிரிக்கெட் ஷாட். இந்த பையன் உண்மையிலேயே மிகவும் ஸ்பெஷல்," என்று பாராட்டினார்.
"கம்பீர் ஏன் அவரை நீக்கினார்?"
மூன்று தோல்விகளுக்குப் பிறகு வைபவை அணியில் இருந்து நீக்கியது தவறான முடிவு என்று ஸ்ரீகாந்த் சாடினார். "மூன்று போட்டிகளில் ரன்கள் எடுக்கவில்லை என்பதற்காக அவருடைய தன்னம்பிக்கையை உடைக்கும் வகையில் கம்பீர் அவரை நீக்கியது மிகவும் தவறான முடிவு. இவ்வளவு திறமை கொண்ட ஒரு வீரரை இப்படிச் செய்யக்கூடாது," என்று அவர் கூறினார்.
ராஜஸ்தான் ராயல்ஸ் முகாமில் கடுமையான பயிற்சி
இங்கிலாந்து தொடர் முடிந்ததும் ஓய்வெடுக்காமல் நேராக ராஜஸ்தான் ராயல்ஸ் பயிற்சி முகாமுக்கு சென்று தனது பலவீனத்தை சரிசெய்த விதத்தையும் ஸ்ரீகாந்த் பாராட்டினார். "இங்கிலாந்து தொடருக்குப் பிறகு அவர் வீட்டுக்கே செல்லவில்லை. நேராக ராஜஸ்தான் ராயல்ஸ் முகாமுக்குச் சென்று, ஷார்ட் பந்துகளை எப்படி எதிர்கொள்வது என்பதில் கடுமையாக பயிற்சி செய்தார். உலகத்திற்கு தான் ஒரு சிறப்பு வீரர் என்பதை நிரூபிக்க வேண்டும் என்ற பசியோடு உழைத்துள்ளார். அதற்காக அவருக்கு நான் சல்யூட் செய்கிறேன்," என்றார்.
"250 ஸ்டிரைக் ரேட்டில் விளையாடுவது சாதாரண விஷயம் அல்ல"
வைபவின் அதிரடி பேட்டிங் உலகத் தரத்தில் இருப்பதாக ஸ்ரீகாந்த் கூறினார்.
"250 ஸ்டிரைக் ரேட்டில் இவ்வளவு எளிதாக ரன்கள் குவிப்பது சாதாரண விஷயம் கிடையாது. மூன்று தோல்விகளுக்குப் பிறகு பல வீரர்கள் அணியில் இடத்தை காப்பாற்றிக்கொள்ள ஒற்றை, இரட்டை ரன்கள் எடுப்பார்கள். ஆனால் வைபவ் எந்த பயமும் இல்லாமல் தனது இயல்பான அதிரடி ஆட்டத்தை வெளிப்படுத்தினார். அவருக்கு 18 பந்துகளில் அரைசதம் அடிப்பது குழந்தைகள் விளையாட்டைப் போல ஆகிவிட்டது," என்று புகழ்ந்தார்.
"தொடர்ந்து 10 போட்டிகள் வாய்ப்பு கொடுக்க வேண்டும்"
வைபவ் சூர்யவன்ஷிக்கு தொடர்ச்சியாக வாய்ப்பு வழங்க வேண்டும் என்றும், எதிர்காலத்தில் இந்தியாவின் முக்கிய மேட்ச் வின்னராக உருவெடுப்பார் என்றும் ஸ்ரீகாந்த் நம்பிக்கை தெரிவித்துள்ளார். "அவருக்கு குறைந்தது 10 போட்டிகள் தொடர்ந்து வாய்ப்பு கொடுக்க வேண்டும். அப்படிச் செய்தால் தனி ஆளாகவே நான்கு அல்லது ஐந்து போட்டிகளை இந்தியாவுக்கு வென்று கொடுப்பார். காலப்போக்கில் தனது குறைகளை சரிசெய்து இன்னும் பெரிய வீரராக மாறுவார்.
டி20 மட்டுமல்ல, 2027 ஒருநாள் உலகக் கோப்பை அணியிலும் அவர் இருக்க வேண்டும். டெஸ்ட் கிரிக்கெட்டிலும் கூட அவரை நான் புறக்கணிக்க மாட்டேன்," என்று ஸ்ரீகாந்த் தெரிவித்துள்ளார். வைபவ் சூர்யவன்ஷியின் ஜிம்பாப்வே இன்னிங்ஸ், அவரைச் சுற்றியிருந்த அனைத்து விமர்சனங்களுக்கும் பதிலடி கொடுத்ததோடு, இந்திய கிரிக்கெட்டின் அடுத்த தலைமுறை நட்சத்திரம் என்ற நம்பிக்கையையும் மேலும் வலுப்படுத்தியுள்ளது.
