அபிஷேக் சர்மா குறித்து ஸ்ரீகாந்த் அதிரடி கருத்து
இந்திய அணியின் இளம் தொடக்க வீரர் அபிஷேக் சர்மாவின் தொடர்ச்சியான மோசமான ஆட்டம் தற்போது கடுமையான விமர்சனங்களை சந்தித்து வருகிறது. ஜிம்பாப்வே தொடரிலும் எதிர்பார்த்த அளவுக்கு ரன்கள் எடுக்கத் தவறிய நிலையில், முன்னாள் இந்திய கேப்டன் கிருஷ்ணமாச்சாரி ஸ்ரீகாந்த், அபிஷேக் சர்மா குறித்து தேர்வுக்குழு கடினமான முடிவை எடுக்க வேண்டிய நேரம் வந்துவிட்டதாக தெரிவித்துள்ளார்.
"இனி சஞ்சுவுக்கு வாய்ப்பு கிடைக்கும்"
தனது யூடியூப் சேனலில் பேசிய ஸ்ரீகாந்த், "உலகக் கோப்பை தொடரில் இருந்தே அபிஷேக் சர்மாவை சர்வதேச கிரிக்கெட் பந்துவீச்சாளர்கள் நன்றாகப் புரிந்துகொண்டுவிட்டனர். அதனால் இப்போது அவர் மீது கடினமான முடிவை எடுக்க வேண்டிய நேரம் வந்துவிட்டது. சஞ்சு சாம்சனுக்கு மீண்டும் வாய்ப்பு கிடைக்கும் என்று நான் உறுதியாக நம்புகிறேன். தேர்வுக்குழு இதுகுறித்து தைரியமான முடிவை எடுக்க வேண்டும்," என்றார்.
"சஞ்சுவுக்கு ஒரு விதி... அபிஷேக்குக்கு இன்னொரு விதியா?"
அபிஷேக் சர்மாவுக்கு தொடர்ந்து வாய்ப்புகள் வழங்கப்படுவது குறித்து ஸ்ரீகாந்த் கேள்வி எழுப்பினார். "உலகக் கோப்பைக்குப் பிறகு அபிஷேக் சர்மாவின் சர்வதேச சாதனையைப் பார்த்தால், ஒரு சில இன்னிங்ஸ்களைத் தவிர பெரிய அளவில் எதுவும் இல்லை. ஆனால் அதே உலகக் கோப்பையில் சஞ்சு சாம்சன் தொடர்நாயகனாக (MVP) தேர்வு செய்யப்பட்டார். அப்படியிருக்கும்போது ஏன் சஞ்சுவுக்கு தொடர்ந்து வாய்ப்பு கிடைக்கவில்லை? அபிஷேக்குக்கு மட்டும் ஏன் இவ்வளவு நீண்ட வாய்ப்பு கொடுக்கப்படுகிறது? இது மிகவும் நியாயமான கேள்வி," என்று அவர் கூறினார்.
தேர்வில் ஒரே அளவுகோல் இருக்க வேண்டாமா?
ஒரு வீரர் தொடர்ந்து சொதப்பினால் அவரை ஓய்வில் அமர்த்துவது இயல்பான நடைமுறை. ஆனால் அதே விதிமுறை அனைத்து வீரர்களுக்கும் சமமாக பின்பற்றப்பட வேண்டும் என்பதே தற்போது ரசிகர்களின் கருத்தாக உள்ளது. சஞ்சு சாம்சன் சில போட்டிகளில் ரன் எடுக்கத் தவறியபோது உடனடியாக அணியில் இருந்து நீக்கப்பட்டார். ஆனால் அபிஷேக் சர்மாவுக்கு தொடர்ந்து வாய்ப்புகள் வழங்கப்படுவது இரட்டை அளவுகோலாக இருப்பதாக சமூக வலைதளங்களில் ரசிகர்கள் விமர்சித்து வருகின்றனர்.
கம்பீர் - தேர்வுக்குழுவின் அடுத்த முடிவு என்ன?
தற்போது இந்திய அணி மாற்றத்திற்கான கட்டத்தில் இருப்பதால், வீரர்களுக்கு வாய்ப்பு வழங்குவது அவசியம். அதே நேரத்தில், தொடர்ந்து வாய்ப்புகளை வீணடிக்கும் வீரர்களிடம் கடினமான முடிவுகளையும் எடுக்க வேண்டிய சூழல் உருவாகியுள்ளது. அபிஷேக் சர்மாவுக்கு மேலும் வாய்ப்பு வழங்கப்படுமா?
அல்லது உலகக் கோப்பை தொடரில் இந்திய அணிக்காக மிகப்பெரிய பங்களிப்பு செய்த சஞ்சு சாம்சனுக்கு மீண்டும் இடம் கிடைக்குமா? என்பது அடுத்த தொடருக்கான இந்திய அணித் தேர்வில் மிகப்பெரிய விவாதமாக இருக்கும். ஸ்ரீகாந்த் எழுப்பிய கேள்வி தற்போது ரசிகர்கள் மத்தியில் மட்டுமல்ல, இந்திய அணியின் தேர்வு முறையையும் மீண்டும் விவாதப் பொருளாக மாற்றியுள்ளது.
