1.நேரில் சந்தித்து ஆறுதல் கூறிய அமைச்சர்
தமிழ் சினிமாவின் மூத்த நகைச்சுவை நடிகரான பாவா லக்ஷ்மணனை அமைச்சர் ராஜ்மோகன் நேரில் சந்தித்து ஆறுதல் கூறியுள்ளார். சமீபத்தில் அளித்த பேட்டிகளில் தனது வாழ்க்கை மற்றும் தற்போதைய சூழல் குறித்து பாவா லக்ஷ்மணன் பகிர்ந்த கருத்துகள் பலரையும் நெகிழ்ச்சியடையச் செய்திருந்தன. இதையடுத்து அவரை நேரில் சந்தித்த அமைச்சர் ராஜ்மோகன், மனம் திறந்து பல உறுதியான வார்த்தைகளை கூறியுள்ளார்.
2."உங்கள் ரசிகர்களில் நானும் ஒருவன்"
பாவா லக்ஷ்மணனிடம் பேசிய அமைச்சர் ராஜ்மோகன், "உங்களுக்கு இருக்கும் ரசிகர்களில் நானும் ஒருவன். நான் உங்களுக்கு ஒரு சகோதரன் மாதிரி. உங்கள் பேட்டிகள் அனைத்தையும் பார்த்தேன். அதை கேட்ட பிறகு மனம் மிகவும் வருத்தமடைந்தது. நீங்கள் 'கேப்டன் இருந்திருந்தால் இந்த நிலைமை வந்திருக்காது' என்று சொன்னதை கேட்டபோது மிகவும் வேதனையாக இருந்தது. கேப்டனின் தம்பிகளாக நாங்கள் அனைவரும் இருக்கிறோம். நீங்கள் எந்தக் கவலையும் கொள்ள வேண்டாம்" என்று உருக்கமாக தெரிவித்தார்.
3."எந்த நலிந்த கலைஞரையும் கைவிட மாட்டோம்"
தொடர்ந்து பேசிய அவர், "அண்ணன் முதலமைச்சர் தலைமையிலான இந்த ஆட்சியில் எந்த நலிந்த கலைஞரையும் நாங்கள் கைவிட மாட்டோம். உங்களால் முடிந்த அளவுக்கு மக்களை சிரிக்க வைத்திருக்கிறீர்கள். 'வாம்மா மின்னல்', 'மாப்பிள்ளை மொக்கச்சாமி வந்திருக்காங்க' போன்ற உங்கள் வசனங்கள் இன்றும் ரசிகர்களின் மனதில் வாழ்கின்றன. உங்களைப் போன்ற கலைஞர்களுக்கு அரசு எப்போதும் துணையாக இருக்கும்" என்று உறுதியளித்தார்.
4.எம்எல்ஏ விடுதியில் தங்க அழைப்பு
பாவா லக்ஷ்மணனின் தற்போதைய சூழலை கருத்தில் கொண்டு, "நான் உங்களுக்கான அடுத்த ஏற்பாடுகளை செய்யும் வரை என்னுடைய எம்எல்ஏ விடுதியில் தங்கிக் கொள்ளுங்கள். அது உங்கள் இடம். எந்த தயக்கமும் வேண்டாம். உங்களால் முடிந்த அளவுக்கு அல்ல, என்னால் முடிந்த எல்லா உதவிகளையும் நான் செய்வேன். உங்களை நான் பார்த்துக் கொள்கிறேன்" என்று அமைச்சர் ராஜ்மோகன் அன்புடன் கூறினார்.
5."கலைத்துறைக்கு மீண்டும் வாருங்கள்"
இறுதியாக, "ஆடிய காலும், பாடிய வாயும் சும்மா இருக்கக் கூடாது. உங்களிடம் இன்னும் நிறைய கலை இருக்கிறது. அதனால் மீண்டும் கலைத்துறைக்கு வாருங்கள். ரசிகர்கள் உங்களை மீண்டும் திரையில் பார்க்க விரும்புகிறார்கள். உங்கள் மறுபிரவேசத்திற்கு என்னால் முடிந்த அனைத்து உதவிகளையும் செய்வேன்" என்று அமைச்சர் ராஜ்மோகன் உறுதியளித்தார். அவரது இந்த மனிதநேய அணுகுமுறை ரசிகர்கள் மற்றும் திரையுலகினர் மத்தியில் பாராட்டைப் பெற்று வருகிறது.
