50 ஆண்டுகால நட்புக்கு ராதிகாவின் உருக்கமான அஞ்சலி
இயக்குநர், நடிகர், திரைக்கதை ஆசிரியரான கே. பாக்யராஜ் ஜின் மறைவு தமிழ் திரையுலகையே சோகத்தில் ஆழ்த்தியுள்ளது. திரைப் பிரபலங்கள், அரசியல் தலைவர்கள், ரசிகர்கள் என பலரும் அவருக்கு கண்ணீர் அஞ்சலி செலுத்தி வரும் நிலையில், நடிகை ராதிகா சரத்குமார் தனது சமூக வலைதளப் பதிவின் மூலம் மனம் உருகும் அஞ்சலியை பகிர்ந்துள்ளார். சுமார் 50 ஆண்டுகள் நீண்ட நட்பை நினைவுகூர்ந்த அவர், பாக்யராஜை இழந்த வேதனையை உணர்ச்சிப்பூர்வமாக வெளிப்படுத்தியுள்ளார்.
"50 ஆண்டுகால நட்புக்கு இறுதி விடை"
"50 ஆண்டுகளாக நீடித்த மிகவும் சிறப்பான நட்புக்கு இன்று இறுதி விடை கொடுக்கிறேன். அற்புதமான படைப்பாளி, வளர்ச்சியடைந்த எழுத்தாளர், சினிமாவில் தனக்கென ஒரு தனித்துவமான எல்லையை உருவாக்கியவர். என்னுடன் எண்ணற்ற சிரிப்புகளையும், மறக்க முடியாத படைப்புகளையும் பகிர்ந்து கொண்டவர். என் குடும்பத்திற்கு எப்போதும் அமைதியாகவும், விசுவாசமாகவும் துணையாக நின்றவர். அவரது மறைவு குடும்பத்தினர், நண்பர்கள், திரையுலகினர் மற்றும் ரசிகர்கள் அனைவருக்கும் மிகப்பெரிய அதிர்ச்சியாக உள்ளது" என்று ராதிகா தனது பதிவில் குறிப்பிட்டுள்ளார்.
"அஞ்சலி செலுத்த வேண்டிய இடம் சர்க்கஸாக மாறிவிட்டது"
அதுமட்டுமல்லாமல், பாக்யராஜின் இறுதி அஞ்சலி நிகழ்வில் ஏற்பட்ட சூழல் குறித்தும் ராதிகா தனது வேதனையை வெளிப்படுத்தியுள்ளார். "அமைதியாக துக்கம் அனுசரித்து அஞ்சலி செலுத்த வேண்டிய இடம், அங்கு வந்தவர்களால் ஒரு சர்க்கஸைப் போல மாறிவிட்டது. நாம் எப்போது இவ்வளவு இரக்கமற்றவர்களாக மாறினோம்? அல்லது ஏற்கனவே அப்படியே மாறிவிட்டோமா?" என்று அவர் வேதனையுடன் கேள்வி எழுப்பியுள்ளார்.
அரசும் திரையுலகமும் இணைந்து நடைமுறைகளை உருவாக்க வேண்டும்
இறுதிச்சடங்குகளில் கண்ணியத்தை பாதுகாக்கும் வகையில் அரசு மற்றும் திரையுலகம் இணைந்து உரிய வழிகாட்டுதல்கள் மற்றும் நடைமுறைகளை உருவாக்க வேண்டும் என்றும் ராதிகா வலியுறுத்தியுள்ளார். "மறைந்தவரின் ஆன்மாவுக்கு முழு மரியாதை கிடைக்கும் வகையில் அரசு மற்றும் திரையுலகம் ஒன்றிணைந்து நெறிமுறைகளை வகுக்க வேண்டும். அப்போதுதான் இறுதி அஞ்சலி நிகழ்வுகள் கண்ணியத்துடனும் அமைதியுடனும் நடைபெறும்" என்று தனது பதிவை நிறைவு செய்துள்ளார்.
ராதிகாவின் பதிவு இணையத்தில் வைரல்
ராதிகாவின் இந்த பதிவு சமூக வலைதளங்களில் வேகமாகப் பரவி வருகிறது. குறிப்பாக, இறுதி அஞ்சலி நிகழ்வுகளில் ஊடக நெரிசல், கூட்ட நிர்வாகம் மற்றும் மறைந்தவர்களுக்கு வழங்கப்பட வேண்டிய கண்ணியம் குறித்து அவர் எழுப்பிய கேள்விகள் பலரது கவனத்தை ஈர்த்துள்ளன. அவரது கருத்துக்கு ஆதரவாக திரையுலக பிரபலங்கள், ரசிகர்கள் மற்றும் சமூக வலைதள பயனர்கள் பலரும் தங்களது கருத்துகளை பகிர்ந்து வருகின்றனர்.
