தந்தையின் மறைவால் சோகத்தில் மூழ்கிய குடும்பம்
இயக்குநரும், நடிகருமான கே. பாக்யராஜின் மறைவு தமிழ் திரையுலகையே சோகத்தில் ஆழ்த்தியுள்ளது. அவரது உடலுக்கு அரசியல் தலைவர்கள், திரைப் பிரபலங்கள் மற்றும் ஆயிரக்கணக்கான ரசிகர்கள் நேரில் அஞ்சலி செலுத்தினர். தமிழக முதலமைச்சர் விஜய்யும் நேரில் சென்று பாக்யராஜின் உடலுக்கு மலர்வளையம் வைத்து மரியாதை செலுத்தியதுடன், அவரது குடும்பத்தினருக்கும் ஆறுதல் தெரிவித்தார். குறிப்பாக, பாக்யராஜின் மனைவி பூர்ணிமா மற்றும் குடும்பத்தினரிடம் அவர் காட்டிய அக்கறை பலரது கவனத்தை ஈர்த்தது.
உருக்கமான பதிவை வெளியிட்ட சாந்தனு
இந்த நிலையில், நடிகர் சாந்தனு தனது எக்ஸ் (X) சமூக வலைதளத்தில் முதலமைச்சர் விஜய்க்கு உருக்கமான நன்றி பதிவை வெளியிட்டுள்ளார். அதில், "உங்களுக்கான என் நன்றியை 26 எழுத்துகளிலோ, 247 வார்த்தைகளிலோ அடக்கிவிட முடியாது. இந்த நன்றி என் உயிர் உள்ளவரை நீடிக்கும். என் திருமணத்தின் போது தாலி எடுத்துக் கொடுத்து என் வாழ்க்கையின் மகிழ்ச்சியான நாளை தொடங்கி வைத்தீர்கள். அதற்கே இன்னும் முழுமையாக நன்றி சொல்ல முடியவில்லை," என்று குறிப்பிட்டுள்ளார்.
"அம்மாவிடம் மண்டியிட்டு ஆறுதல் சொன்னது நெகிழ்ச்சியாக இருந்தது"
தொடர்ந்து தனது பதிவில், "என் வாழ்க்கையின் மிகுந்த துயரமான நாளான என் தந்தையின் மறைவில், முதலமைச்சர் என்ற அந்தஸ்தை ஒதுக்கிவிட்டு, சாதாரண மனிதராக மண்டியிட்டு என் அம்மாவுக்கு ஆறுதல் கூறிய அந்த தருணம் என்னை மிகவும் நெகிழச் செய்தது. அது ஒரு அரசியல் தலைவரின் செயல் மட்டுமல்ல; ஒரு குடும்பத்தின் துயரத்தை உணர்ந்த மனிதநேயத்தின் வெளிப்பாடாக நான் பார்க்கிறேன்," என்று சாந்தனு உருக்கமாக தெரிவித்துள்ளார்.
அரசு மரியாதைக்கு நன்றி தெரிவித்த சாந்தனு
மேலும், தனது தந்தைக்கு வழங்கப்பட்ட அரசு மரியாதைக்காகவும் முதலமைச்சர் விஜய்க்கு சாந்தனு நன்றி தெரிவித்துள்ளார். "ஒரு கலைஞனுக்கு மரணத்திற்குப் பிறகும் அரசு மரியாதை கிடைப்பது மிகப்பெரிய பாக்கியம். என் தந்தையின் பெயருக்கு ஏற்ற கம்பீரமான அரசு மரியாதையை நீங்கள் வழங்கினீர்கள். அந்த நன்றியை என் வாழ்நாள் முழுவதும் மறக்க மாட்டேன். இப்போது என்ன சொல்வது என்று தெரியவில்லை... இதயம் கனிந்த நன்றி அண்ணா," என்று தனது பதிவை நிறைவு செய்துள்ளார்.
வைரலாகும் சாந்தனுவின் பதிவு
சாந்தனுவின் இந்த பதிவு சமூக வலைதளங்களில் வேகமாகப் பரவி வருகிறது. முதலமைச்சர் விஜய் பாக்யராஜ் குடும்பத்திற்கு அளித்த ஆறுதல், அரசு மரியாதை மற்றும் மனிதநேய அணுகுமுறையை பாராட்டி பலரும் கருத்து தெரிவித்து வருகின்றனர். குறிப்பாக, சாந்தனுவின் உணர்ச்சிப்பூர்வமான வார்த்தைகள் ரசிகர்களிடையே பெரும் வரவேற்பைப் பெற்றுள்ளன.
